Isaiah 50
Aisaia 50:4-11
Anutu täŋo watä äma uwä man buramik täŋpani
4Ekäni Yawetä äma kehäromini paorani täŋ-mehamtaŋ yämetta näwetpäŋ näwoŋäreŋpäŋ mena täŋpidäm taŋkuk. Ba unitä tamimaŋ tamimaŋ man näwet täyak unita gäripi nadäkta bänepna täŋpidäm tak täyak.5Täŋkaŋ Ekäni Yawetä nadäk-nadäk namik täyak unita näk ärowani kudän täŋpäŋ mäde nämo ut imik täyat.
6 a Täŋpäkaŋ jop yabäŋira ämatä iwänaptä päripmäŋpäŋ geŋna pujiŋ iŋitpäŋ dätkuŋ. Ba man waki näwetpäŋ iwit iŋamna dapunken ut näbatnayäŋ täŋirä iŋamna dapun nämo peŋpipiŋkut.
7Täŋpäkaŋ Ekänina Yawetä täŋkentäŋ namik täyak unita man waki näwet täkaŋ unitä täga nämo nurek.
Nämoinik! Näk kehärom taŋpäŋ epäna täk täyat. Näk ŋode nadäk täyat; Epän täk täyat unita mäyäk täga nämo api yäpet.
8 b Anutu dubinaken itak unitä näka api yäwek; Äma ŋo goret kubä nämo täŋpani yäŋ api yäwek.
Anututä näka ude yäwayäŋ täyak unita äma kubätä manken nepmaŋpayäŋ nadäweko uwä, eruk, ini nepmaŋpänkaŋ Yawe iŋamiken bok kaŋ itda!
9Ekäni Yawetä ini täŋkentäŋ namik täyak unita netätä näka goret täŋpani äma yäŋ täga yäwek? Nämoinik, äma näka jop manman näweranitä waŋpäŋ tek gwaktä naŋ-äreyäŋ täŋpä kuk täkaŋ ude api täneŋ.
10Unita ämawebe Yawe gämoriken kuŋatpäŋ watä ämani näkŋo man buramik täkaŋ in uwä nämo umuntäneŋ. Bipmäŋ urani pähap gänaŋ kuŋatnayäŋ täŋo upäŋkaŋ nadäk-nadäkjin kudup Yawe terak peŋpeŋ kuŋat täkot. Bureni, Anutujin terak yeŋgämä pewäpäŋ itkot.
11Täŋ ämawebe in Yaweta nadäŋ imikinik nämo täŋkaŋ bipmäŋ uraniken kädet kaŋpeŋ kukta injin-tägän topän ijiŋ-yäŋek täkaŋ uwä, eruk gwäk pimiŋpäŋ ugän iwat täkot.
Upäŋkaŋ intä kome päŋku itnayäŋ täkaŋ u Yawetä iwoyäŋ tamiŋkuko uwä komi paot-paori nämo täŋo bägup.
Copyright information for
IOU